Ernesto Tagliaferri - Tarantella internazionale

Tarantè!
Marì, pecché te sì sbizzarrita
Cu chesti mmuseche furastiere?
Tarantè!
Mò cu "Valenzia", mò cu "Paquita"
Napulitano nun cante cchiù!

Se scetassero
Tutt' 'e ccanzone 'e 'nu seculo
Fatte a Napule
Primm' 'e 'sti mmuseche, oje nè!
Datammillo 'nu tammurro:
Voglio 'o popolo attuorno a mme!

Quà spagnola? Quà americana?
Ma s' 'o ccredono o fanno apposta?
Chest'è museca paisana!
Chest'è pane d' 'a casa nosta!
Chist'è Napule quann'abballa
Tarantella, tarantè!

Tarantè!
Tammorre e zzuoccole Culumbina
Pulecenella c' 'o cuppulone
Tarantè!
Mò sì spagnola, sì parigina
E 'a gente crede ch'è nuvità!
Nun pe' dicere:
Chest'è 'a scuperta 'e ll'America!
Basta sentere
Pe' tutt' 'o munno cantà
Cu chitarre e manduline
"Funiculì, funiculà"!

Quà spagnola? Quà americana?
Ma s' 'o ccredono o fanno apposta?
Chest'è museca paisana!
Chest'è pane d' 'a casa nosta!
Chist'è Napule quann'abballa
Tarantella, tarantè!

Tarantè!
Cu 'stu ciardino, cu 'sta serata
Che vò "Valenzia", che vò "Paquita"?
Tarantè!
Voglio 'a canzona cchiù appassiunata
Cchiù bella e antica, cantata 'a te

Canta e guardame!
'St'uocchie ca ridono e chiagnono
Canta e, a ll'urdemo
Me vide allero turnà!
Cu 'na rosa 'mmiez' ê diente
Tarantella voglio abballà!
Quà spagnola? Quà americana?
Ma s' 'o ccredono o fanno apposta?
Chest'è museca paisana!
Chest'è pane d' 'a casa nosta!
Chist'è Napule quann'abballa
Tarantella, tarantè!